ليه ما بكتبش عربي ؟


أيوه ليه مبكتبش بالعربي؟ .. سؤال طول عمري بسأله لنفسي .. يمكن عشان عمري ما حاولت أو حتى فكرت .. دايماً أمسك القلم واكتب انجليزي .. للأسف كان تعليمي كده .. كل حاجة اتعلمتها اساسها كان انجليزي .. العلوم انجليزي .. الرياضة انجليزي .. كله انجليزي في انجليزي .. حتى العربي اللي كنا بناخده .. المدرسين كانوا دايما تعبانين قوي .. كان دايماً حصة العربي دي كابوس بالنسبة لنا .. كان يخش لنا المدرس من هنا نحس بكآبة السنين ! .. كل اللي همه يرزعلنا الكلمتين ومع السلامة ..

مابقولش إنهم كانوا بيشرحوا غلط لا سمح الله .. كل إللي بقوله إن ماكانش فيه اهتمام باللغة اطلاقاً .. المدرس الوحيد إللي افتكره في حياتي كان في ثانوية عامة .. كان الوحيد إللي عليه القيمة كده .. يحبّبك في المادة ولما كان بيدينا درس الدين كان عنده رؤية .. عارفين إيه الفرق بينه وبين أي مدرس عربي شفته في حياتي؟؟ .. كان صغير .. بمعنى أصح كان شاب .. يمكن يكون في عمري دلوقتي .. بس يا خسارة .. كنت تقريبا خلاص .. إتكون عندي التفكير ..

على فكرة أنا مابقولش إن تعليم اللغة مش مهم .. بس الواحد كل ما بيكبر كل ما بيعرف أد أيـه إن الهوية شئ مهم قوي في الحياة .. ومكدبش إللي قال إللي عايز يتعلم اللغة العربية بجد لازم يقرأ القران .. أحلفلكم بإيـــه .. من وأنا في إعدادي مثلا وأنا كنت بقرأ رواية أو كتاب بالعربي بس عمري ما حسيت بطعم العربي وأد إيـه هى لغة فعلا غنية إلا من القرآن .. سبحان الله ..

لو فاكرين إني بكتب الكلمتين دول عشان أقول لكم درس ديني .. استنوا ما تقلبونيش .. أنا أقل بكتير من إني أتكلم على درس ديني أو اذكر أحاديث .. أنا كل اللي بتكلم عنه إحساسي الداخلي وخبرتي مع العربي ..

نرجع لمرجعنا .. أنا ليه بقى عمري ما جربت أكتب عربي .. في الغالب لأني خايفة .. عندي دايماً هاجس كده في تفكيري إني هكتب وحش قوي .. وعندي يقين إن فيه مليون واحد أحسن مني في الكتابة .. بس إللي متأكدة منه .. إني فعلا نفسي أكتب وأجرب .. ليه لأ؟! .. ليه ما أحاولش .. ليه الموضوع صعب قوي كده .. يمكن واحدة واحدة حأقدر أوصل .. وزي ما تعلمت أكتب بالإنجليزي .. أكيد في يوم هاعرف أبقى أحسن من كده في العربي ..

عارفين إيه الفكرة؟؟!! .. ماينفعش الإنسان يقول "لأ مش بعرف" .. دي أكتر حاجة فى الدنيا ماينفعش تتقال .. واللي يعرفني كويس .. يعرف أد إيـه حياتي تعتبر صعبة إلى حدٍ ما .. فـما بالكم بقى .. إللي حياته صعبة وبيقولك "لأ .. مفيش حاجة اسمها مش بعرف!" .. أكبر نعمة ربنا قدمها لنا في الدنيا "المعرفة" .. من ساعة ما خلق سيدنا آدم وعلّمه الأسماء كلها .. لحد ما خللى العبدة الفقيرة (اللي هو أنا) أعرف أكتب بالعربي ..

مهما حد قال لك مش هتوصل وقعد يتريق عليك .. أول ما يبتدي يقولك على حاجة مش فيك أو يحاول يقنعك بحاجة وإنت مش مستوعبها .. إوعى تسمع كلامه .. أيوه .. إعرف إنك على حق .. ما عدش في كلمة في القاموس إسمها مش بعرف ! ..

أنا أفكر إذاً أنا بعرف أكتب عربي!

و دمتم

Comments

  1. Noha, that's something called the language of the heart? What language does you heart speak? Figure that out than reflect it on the paper :)

    ReplyDelete
  2. Well, I have both languages in my heart .. I just have this constant problem; I need to bring out what I have in my mind .. a3sor demaghy y3ny :)

    And as far as which language is stronger, I think the English is .. But, I would love to write in Arabic more often ..

    So, this piece was kind of an encouragement for me .. :)

    I hope I made sense :D

    ReplyDelete
  3. yeah ... i've the same problem ... and i agree with you ...
    ana ofaker ... ezan ana aktob 3araby ...but i've another prob. ... my lap doesn't write arabic :))

    ReplyDelete
  4. I think there's a plug-in that you can use for this kind of problem Karim .. Google "Microsoft Maren" and you'll be able to use it in no time :)

    ReplyDelete

Post a Comment

Popular posts from this blog

إديني ودنك يا مواطن

A Diamond Treasure - a Short Story