كلاكيت 3 مرة .. أنا مكاني مش هنا :)

كلاكيت 3 مرة .. أنا مكاني مش هنا :)


من ساعة ما وعيت عالدنيا وأنا حاسة إني غريبة .. مكاني مش وسط الناس اللي حواليَّ دي ولا بعرف أعيش وسط العالم دي .. ممكن أكون عايشة في يوتوبيا لوحدي بس اللي متأكدة منه إن فيه ناس زيي كتير حاسين زيي بالظبط بس مش عارفة أوصل لهم .. مهما حاولت اتأقلم ومهما حاربت نفسي برجع من نقطة الصفر .. ومعنديش حل للأسف غير الصبر .. خسرت ناس كتير وعرفت ناس أكتر .. بس دايما عزائي الوحيد إن ربنا يرزقني بالجنة وأعيش تحت عرشه وبس .. هو الحليم الودود الكريم الواحد الأحد الذي لم يلد ولم يولد ولم يكون له كفوا أحد ..

يمكن تسموني مجنونة وأنانية بس والله الذي لا إله إلا هو ما لقيت سعادة غير في طاعة ربنا .. ووصلت لدرجة إن كل اللي بيحصل حواليَّ ده مجرد قصص قصيرة بعيشها يوم بعد يوم ملهاش أي تلاتة لازمة غير إنها تزود أو تنقص حسناتي ..

ده قراري النهارده .. أنا هتوكل على الله وأسلم ليه الأمور .. ربنا عالم باللي في قلبي وعارف كويس غيرتي على ديني وأحلامي إن ينتشر العدل تحت راية الإسلام .. وهتيجي هتيجي ويقيني بالله كبير .. مش هخاف وربنا هيثبتني عشان اللي بينه وبين ربنا عمار عمره ما بيخذله .. الله أكبر فوق كيد أي معتدي ..
وليت قومي يعلمون ... :)

لا عسكر ولا شعب ولا حكومة ولا شيوخ ولا مذيعين ولا إعلام ولا أصحاب ولا شغل ولا أي بني آدم هيغير إيماني بالله وبعقيدتي بيه سبحانه وتعالى .. ولا حد هيقدر يخليني أنفر من ديني الإسلامي .. ببساطة عشان عرفت ربنا وحبيته مش بالكتب ولا بالحواديت .. بحاجة اسمها العشرة :)

نصيحة من قلبي ويا رب تستقبلوها بحب مش إني بتعالى على حد :)
والله مافيش غير ربنا هو نعم الحسب وهو نعم الوكيل ...
ماتخلوش أي حاجة تانية في الدنيا تلهيكم عنه .. قربوا ليه بالحب عشان مفيش أحن منه علينا ... هو اللي باقي لينا .. ما عنده خير وأبقى من الوطن حتى :)

أنا وطني ومكاني الجنة .. يا رب يقبلني ويقبلنا كلنا فيها ... اللهُم آمين ...