Sunday, September 15, 2019

القرار يعني مسئولية




كمية ‫‏البنات‬ اللى قلبها وعقلها فاضى من جوا تقهر القلب ..
حلقة فى ودنك: تاج المرأة الحقيقى ‫‏عقلك وقلبك‬ .. مش جمالك وبس!

إياكى حد يقنعك بغير كده .. إياكى تخلى بنى أدمين يفكروا بدالك ..
إياكى تفرطى فى حقك إنك تتعلمى من غلطك وتكونى أحسن ..

أنتِ ‫‏حُرة‬ .. و ‫‏الحرية‬ معناها ‫‏القرار‬ .. والقرار مش معناه نستمر في الخطأ ..
القرار معناه ‫‏مسئولية‬ .. أمام الله قبل نفسك ..
خافى ‫‏الله‬ وبس .. الله فوق كل شئ وأي حد ..

اعرفي إن حقك تفرحى وحقك تزعلى ..
حقك تحسى بمشاعر وحقك تستخدمى عقلك ويكون عندك بصيرة ..
حقك تكونى جميلة بس حقك تكونى ‫‏ملكة‬ ويكون ‫‏الله وكيلك‬ ..

كونى أنتِ زي ما أنتِ وبس ..


Saturday, September 14, 2019

إعترافات ليلية


No photo description available.

بقيت حاسة إني بكذا شخصية وكذا حالة في الساعة الواحدة .. تغيير متقطع ومالوش ملامح .. مالوش ماسكة ولا تفسير واضح ..

مابقتش عارفة أنا زعلانة ولا فرحانة .. كل اللي واثقة منه إني كارهة لسؤال "مالك" ..
ماعنديش إجابة وماليش خُلق للتفكير فيها ..

مش عايزة حد يسألني لأني غرقانة في الأسئلة وبسأل نفسي في اليوم الواحد كل ثانية تقريباً ..
ليه برّيح اللي حواليّا على حساب نفسي؟ .. ليه مابقتش أحس بطعم حاجة؟ .. ليه محدش عنده استعداد يقبلني زي ما أنا؟ وليه محدش حتى بيحاول يقرّب مني وشايفين إني كئيبة؟ .. ليه الناس بقت مؤذية بالسهولة دي و امتى هبطل اتفاجأ؟ .. هو مش اللي بيصبر بينول؟ طب أنا امتى هرتاح؟ ..

هي الدنيا مش هتبطل تعلّي عليّا؟! .. هو أنا لوحدي اللي كده؟!