The Moon Is My Home | .. N.O.H.A ..

يعدي الوقت ومهما يعدي، لسه بحلم إنه مافرقناش ..  إنه كان مسافر و رجع يشوف فراقه عمل فينا إيه و الدنيا وديتنا لفين .. نفس الفكرة، بس بمشاهد مختلفة .. مرة في أوضة نومه ومرة في المصنع ومرة على السفرة ومرة بره في الطل .. اللي مطمني إني بشوفه مبسوط .. كأنه حس أخيراً كنا بنحبه قد إيه .. الله يرحمك يابا ويحسن مثواك ويقوينا على موانع الخير ويصرف عنا شرور خلقه .. آمين وحشتنا ♥️ #ألف_رحمة_ونور

لسه مش مستوعبة إنك بين يدي رب العالمين ولا مستوعبة الحِمل اللي كنت شايله .. بس عرفت مين بيحبك بجد ومين كان مستني موتك .. يا رب تكون أنت كمان حاسس وعارف بكل حاجة دلوقتي .. هحكيلك يوم ما ربنا يجمعنا من جديد، ويا رب تسمعني المرة دي .. #ألف_رحمة_ونور ♥️

أبويا الله يرحمه كان فاكر إني ماعرفش حاجات كتير عنه .. كان دايماً شايفني نهى الصغيرة ..  مكانش بيحب يسمع سني بقى كام أو يحس إني كبرت .. وكنت بتضايق ساعتها وأسأل نفسي ليه بيستصغرني مع إنه شافني وأنا بكبر قدامه و خلف بعدي أخواتي ..   النهاردة بس فهمت ليه .. فهمت إنه كان بيشوف شبابه وذكرياته الحلوة فيا .. كان نفسه أفضل صغيرة على طول وماكبرش عشان يفتكر مسيرة كفاحه و نجاحاته .. كان بيتفائل بأصغر الأشياء زي إنه يسمى منتج على اسمي أو يستنى اجري عليه و أبوسه أول ما يرجع من الشغل كل يوم .. كنت فاكرة إنه أناني في حبه ليا .. طلعت أنا اللي أنانية! أنا اللي ماقدّرتش لهفته و فرحته بوجودي في حياته .. سامحني يابا إني ماقولتلكش إني بحبك وكنت بخاف عليك من نفسك .. ربنا يقدّرني وأنشر سيرتك الحلوة للناس كلها .. ربنا يغفر لي تقصيري وعدم تقديري لتعبك .. ربنا ينوّر قبرك ويرفع قدرك ..اللهم أمين #ألف_رحمة_ونور  ♥️