The Moon Is My Home | .. N.O.H.A ..

عارف يعنى إيه #سكن؟  يعنى لما تدور على شخص بعينه فى وسط الناس كلها برضه ما تلاقيهوش إلا فيه .. عارف يعنى إيه #حِنّية؟ يعنى لما تبص فى عينه تحسه بيحضنك من غير حتى ما يلمسك .. عارف يعنى إيه #شوق؟ يعنى لما صوته لوحده يفكرك بألف ذكرى وذكرى كنت فاكر إنك نسيتها من سنين .. عارف يعنى إيه #لهفة؟ يعنى لما تحس بدقات قلبه بتنده عليك وتسمعها وإنت بعيد .. عارف يعنى إيه #حُب؟ يعنى كل لحظة وحشة فى حياتكم تتمسح بأستيكة أول ما ينادى إسمك .. عارف يعنى إيه #إخلاص؟ يعنى قلبك وقلبه متعلقين فى حبل وريد واحد .. عارف يعنى إيه #أمل؟ يعنى يقين وعمل وحسن ظن بالله إنه كاتب لك الخير حيث كان .. عارف لو قدرت تلاقى كل دول فى إنسان واحد بس .. إوعى تضيعه من إيديك .. بس فى الحلال :) رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا. #آمين #دعاء

عندى ‫#‏قناعة‬ إنى لو عايشة لوحدى تماماً هقدر أعمل حجات كتير قوي .. لو كنت حرة نفسى ومفيش ضغوط من حواليا بتجرني لقاع الأرض .. كنت فعلياً هطير .. بس كل واحد فينا عنده ‫#‏بلاء‬ كبير فى حياته .. مهما حاول الهرب منه مفيش فايدة .. هيفضل ملاحقه حتى وهو نايم! ملهاش حل غير ‫#‏الصبر‬ و ‫#‏اليقين‬ إن ‫#‏ربي‬ سبحانه وتعالى هيعوضني بأكتر من اللي بحلم بيه .. هيقول له ‫#‏كن_فيكون‬ وهيرزقنى خير مكونتش بتمناه .. أنا عارفة وحاسة إن بيتم إعدادى لحاجة كبيرة .. إيه هى؟! معرفش .. عشان كده ‫#‏بعافر‬ .. بصحى كل يوم على ‫#‏أمل‬ إن فيه ‫#‏جنة‬ .. وإن ‫#‏ما_عند_الله_خيرٌ_وأبقى‬ بفضل الله وحده إن لسه فيا نفس .. أه واللهِ .. دى حكمته هو وحده وأنا مش معترضة بالعكس .. ‫#‏طلب_صغير‬ : لو جيت على بال حد فيكم بالله عليكم ‫#‏ادعولى‬ أنا عارفة إنى ضايقت ناس كتير منى .. بس طمعانة تسمحونى لإنى مش حِمل حد يزعل منى أو يدعى عليّا .. رضا الله عنكم وأرضاكم ورزقكم الخير كله عاجله وآجله ‫#‏آمين‬

بزعل قوي وقلبي بيتقبض لما بلاقي البنات اللي على خُلُق بتقلع الحجاب .. عشان ببقى عارفة قد إيه أخلاقهم جميلة وقلبهم صافي وبحبهم قوي واللهِ وبتمنى لهم كل خير ..  مش زعل شفقة .. زعل حب <3 وعشان عارفة ومتأكدة كم الخير اللي فى فرض #الحجاب بيبقى نفسي يشوفوا الخير ده بعيني ويحسوه  بقلبي (لإني على يقين إن الهداية إلى طاعة من عند الله وحده) ..  بس هأقولك حاجة واحدة بس .. كفاية إنك تبقي سنة حسنة وسط ظلام كتير مالوش أخر .. ومش معنى إن فيه بنات كتير مش ملتزمين بعِفة الحجاب يبقى كله كده :) .. كلنا بنجتهد وكلنا بنعمل اللي نقدر عليه وبندعى كل يوم ربنا يشيل من قلوبنا الكِبر والحقد .. إهداء لكل صحابي وأخواتي البنات اللي قرروا وقلعوا الحجاب الفترة اللي فاتت .. أنا مش بحكم عليكي أبداً على قد ما بخاف عليكي .. ده قرارك وإنتي حرة فيه .. وبدعيلك من قلبي يوفقك الله لما يحبه ويرضاه ويرزقك قُربه ومحبته .. #آمين الإيمان ما وقر فى القلب وصدّقه العمل .. كلنا متعلقين بقشاية .. {وكذلك كنتم من قبل} نسأل الله السلامة والثبات .. #آمين ادعولي معاكم <3 أُحبكم فى ال...

أَمْ يَحْسَبُونَ أَنَّا لَا نَسْمَعُ سِرَّهُمْ وَنَجْوَاهُم بَلَى وَرُسُلُنَا لَدَيْهِمْ يَكْتُبُونَ (٨٠) •• إوعى تآمن للشيطان .. •• إوعى تآمن لنفسك الأمارة بالسوء .. •• إوعى ينسّوك إن #رب_العالمين سامع سِرّك ونجواك طول الوقت .. كل اللي بتفكر فيه بيتكتب .. كل نفس بتتنفسه .. كل خطوة .. كل قرار .. كل معاملة .. كل كلمة .. كل حرف .. معاك وإنت بتعصيه أو بتعبده .. •• وفوق كل ده .. إوعى تستهين بقدرة #الله عز وجل .. إوعى تسوّف #التوبة أكتر من كده .. خد بالك من سحر #الوسطية .. مش في كل حاجة تعتمد على ربنا #الغفور #الرحيم .. لازم تفكّر نفسك دايماً إنه #القوي #المتين #المُحي #المميت .. •• داوم على #الإستغفار .. أمورنا كلها بيد الله وحده لا شريك له .. ولا حول ولا قوة إلا به .. #كن_مع_الله .. #كن_مع_التواب_الرحيم #سورة_الزخرف #لن_نهجر #قرآن #الفجر #تدبر_القرآن #عايش_معاه

فَالْتَقَمَهُ الْحُوتُ وَهُوَ مُلِيمٌ (١٤٢) فَلَوْلا أَنَّهُ كَانَ مِنَ الْمُسَبِّحِينَ (١٤٣) لَلَبِثَ فِي بَطْنِهِ إِلَى يَوْمِ يُبْعَثُونَ (١٤٤) •• #يا_الله !! سيدنا #يونس كان هيفضل في بطن الحوت ليوم الدين .. متخيل؟! .. #يوم_الدين !! كل ده عشان ضِعف للحظة وزِهق وأعرض عن الدور اللي #رب_العالمين أسنده إليه لدعوة الناس .. •• كل ده عشان نسي إن الله سبحانه وتعالى هو #القادر على كل شئ وما عليه غير تطبيق ما يأمره .. يثق فيه ويشتغل ويدعو والأمر كله على الله .. •• أكيد كان بيقول في نفسه: "مش هينفع" .. "مش هيحصل" .. "ربنا مش راضي عني" .. "كده كده هدخل النار .. مش فارقة" .. •• يا ترى إنت كمان بتعمل كده ولا لسه في قلبك #كِبر إنك أحسن من فلان وفلان وإشمعنى هو/هي؟! ..  طب وإنت زعلان بتلوم الظروف والناس بس ولا بتعترف بأخطائك ونفسك تتغير؟! .. •• طب على سبيل التشجيع .. إيه رأيك تلحق #التوبة النهاردة قبل بكرة؟! .. جرب #الإنكسار_لله والإعتراف بقدرته وشوف هيحصل معاك إيه .. بس خليك واعي إنه #الأحد #الصمد مالك السموات والأرض وإنك مج...

أصوات سارينة ونباح كلاب وشتايم من أفواه عيال ضآلة وزعيق بني أدمين وكلاكسات عربيات متزاحمة وحر وعرق وتعطيل مصالح وإصدار أحكام بالإعدام وشباب بينزل من بيته عشان يموت وشوية عواجيز حرامية متحكمة في بلد متمرمغة في الحرام والفساد .... إلخ إلخ إلخ  كل "ده" وفي ال background فيه صوت صغير جاي من بعيد .. صوت عصافير بتحاول تنادي على بعض .. الشئ الوحيد اللي متخيلاها بتقوله : "ما عِند الله خيرٌ وأبقى .." "ما عِند الله خيرٌ وأبقى .." "ما عِند الله خيرٌ وأبقى .." #يا_رب الصبر من عندك .. لا حول ولا قوة إلا بك <3

•• مشتاق ل #الجنة بس حاسس إنك ماتستهلش؟! جرب الخطوات دي: وَسَارِعُوا إِلَى مَغْفِرَةٍ مِنْ رَبِّكُمْ وَجَنَّةٍ عَرْضُهَا السَّمَاوَاتُ وَالأَرْضُ أُعِدَّتْ لِلْمُتَّقِينَ (١٣٣)  الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ وَاللَّهُ يُحِبُّ الْمُحْسِنِينَ (١٣٤)  وَالَّذِينَ إِذَا فَعَلُوا فَاحِشَةً أَوْ ظَلَمُوا أَنْفُسَهُمْ ذَكَرُوا اللَّهَ فَاسْتَغْفَرُوا لِذُنُوبِهِمْ وَمَنْ يَغْفِرُ الذُّنُوبَ إِلا اللَّهُ وَلَمْ يُصِرُّوا عَلَى مَا فَعَلُوا وَهُمْ يَعْلَمُونَ (١٣٥)  أُولَئِكَ جَزَاؤُهُم مَّغْفِرَةٌ مِّن رَّبِّهِمْ وَجَنَّاتٌ تَجْرِي مِن تَحْتِهَا الْأَنْهَارُ خَالِدِينَ فِيهَا وَنِعْمَ أَجْرُ الْعَامِلِينَ (١٣٦)  •• يعني طلب المغفرة + إنفاق صدقات + كظم الغيظ + العفو + الإحسان + الإعتراف بالمعصية + ذكر الله + الإستغفار + ترك المعصية وعدم الإصرار عليها = مغفرة من الله + جنات تجري من تحتها الأنهار (مش جنة واحدة!) •• #سورة_آل_عمران #لن_نهجر #تدبر_القرآن #الفجر  #عايش_معاه ...

الشيطان ده حاجة عالمية يا جدع! عنده قدرة عجيبة يحسسك قد إيه إنت إنسان ضعيف وهذيل وملكش أي لازمة في الحياة .. لا وكمان مش مكفيه .. لازم يبعتلك الماضي يطاردك ويقلل من توبتك لربنا .. يختار دايما أقذر ذنب عملته في حياتك ويجيبه قدامك ويقولك "شوف؟! الذنب قدامك أهو .. بشحمه ولحمه .. شفت إنك لسه زي ما إنت؟؟!!" وهنا ييجي الثبات اللي ربنا رزقك بيه والصحبة الصالحة اللي تعينك وتفكرك إنك لسة نضيف .. لسة جواك حاجة حلوة ربنا بيحبها .. لسة فيه أمل .. لسة فيك نفس سبحان الله التواب الودود السميع العليم .. لولا رحمة الكريم المعين كنا ضعنا ضعنا !!!! اللهُم يا مقلب القلوب ثبت قلوبنا على دينك ... الحمد لله الذي عافانا مما ابتلى به غيرنا وفضلنا على كثيرا من خلقه ..  —  feeling ‎ الحمدلله ‎.

كلاكيت 3 مرة .. أنا مكاني مش هنا :) من ساعة ما وعيت عالدنيا وأنا حاسة إني غريبة .. مكاني مش وسط الناس اللي حواليَّ دي ولا بعرف أعيش وسط العالم دي .. ممكن أكون عايشة في يوتوبيا لوحدي بس اللي متأكدة منه إن فيه ناس زيي كتير حاسين زيي بالظبط بس مش عارفة أوصل لهم .. مهما حاولت اتأقلم ومهما حاربت نفسي برجع من نقطة الصفر .. ومعنديش حل للأسف غير الصبر .. خسرت ناس كتير وعرفت ناس أكتر .. بس دايما عزائي الوحيد إن ربنا يرزقني بالجنة وأعيش تحت عرشه وبس .. هو الحليم الودود الكريم الواحد الأحد الذي لم يلد ولم يولد ولم يكون له كفوا أحد .. يمكن تسموني مجنونة وأنانية بس والله الذي لا إله إلا هو ما لقيت سعادة غير في طاعة ربنا .. ووصلت لدرجة إن كل اللي بيحصل حواليَّ ده مجرد قصص قصيرة بعيشها يوم بعد يوم ملهاش أي تلاتة لازمة غير إنها تزود أو تنقص حسناتي .. ده قراري النهارده .. أنا هتوكل على الله وأسلم ليه الأمور .. ربنا عالم باللي في قلبي وعارف كويس غيرتي على ديني وأحلامي إن ينتشر العدل تحت راية الإسلام .. وهتيجي هتيجي ويقيني بالله كبير .. مش هخاف وربنا هيثبتني عشان اللي بينه وبين ربنا عمار عمره...