إعترافات ليلية

#إعترافات_ليلية

بقيت حاسة إني بكذا شخصية وكذا حالة في الساعة الواحدة .. تغيير متقطع ومالوش ملامح .. مالوش ماسكة ولا تفسير واضح ..

مابقتش عارفة أنا زعلانة ولا فرحانة .. كل اللي واثقة منه إني كارهة لسؤال "مالك" ..

ماعنديش إجابة وماليش خُلق للتفكير فيها ..

مش عايزة حد يسألني لأني غرقانة في الأسئلة وبسأل نفسي في اليوم الواحد كل ثانية تقريباً ..

ليه برّيح اللي حواليّا على حساب نفسي؟ .. ليه مابقتش أحس بطعم حاجة؟ .. ليه محدش عنده استعداد يقبلني زي ما أنا؟ وليه محدش حتى بيحاول يقرّب مني وشايفين إني كئيبة؟ .. ليه الناس بقت مؤذية بالسهولة دي و امتى هبطل اتفاجأ؟ .. هو مش اللي بيصبر بينول؟ طب أنا امتى هرتاح؟ ..

هي الدنيا مش هتبطل تعلّي عليّا؟! .. هو أنا لوحدي اللي كده؟!