وفاة الأم غير وفاة الأب
#بوست_للذكرى
وفاة الأم غير وفاة الأب
كل واحد فيهم بياخد حتة منك معاه
هل بيفضل حاجة؟ أه بيفضل ..
بيفضل اللي زرعوه فيك ..
سواء صبر أو غضب أو رضا أو مثابرة أو سلبية وغيره وغيره ..
طب الناس دورها إيه في مساندتك؟ ولا حاجة ..
فعلًا؟ ولا حاجة؟
أه ولا حاجة ..
هي مرحلة وهتعدي بحلوها ومُرّها ومش عليك إلا الإنتظار ..
تاخد وقتك وتفهم إن من حقك تركز مع نفسك وإنها أولوية وإنهم مش هيفهموا أنت حاسس بإيه أو بتمر بإيه ..
مش مسئوليتهم ..
لو عرضوا المساعدة، لك مطلق الحرية تقبل أو ترفض .. بس تتحمل مسئولية قرارك في الحالتين ..
أصبحت وحيد ومسئول عن نفسك وعن سلامتك النفسية من بدري .. بس فراقهم بيفوقّك ..
بتعرف مين اللي بيحبك بجد ومين اللي كان جنبك لمصلحته الشخصية ..
مين اللي وجودك مهم عنده وبيخاف عليك ومين اللي كل أفعاله قوالة ..
مين اللي عنده استعداد يقعد معاك عشان بس يونسك ومين اللي بيعمل كده عشان صعبانية وإرداء غرور ..
مين اللي مهم عنده "أنت محتاج إيه" ومين اللي مهم عنده "هو عاوز إيه" ..
أيوة يعني عايزة تقولي إيه يا نهى؟
ولا حاجة
بسيب لنفسي ذكرى إن الحياة لسه فيها كتير ..
ولسه هشوف أكتر وهتعرّض لمشاكل أكبر ..
بس أكيد هتيجي أيام حلوة عشان أستاهل إني أفرح وربنا هيعوضني .. عمره ما ضيعني ولا خذلني ..
ولو منع عني حاجة، فده خير .. حتى لو مش شايفاه دلوقتي ..
هييجي اليوم اللي أفهم ليه كنت هنا وليه بيحصل كده ..
ربنا يقدرّني ويصبّرني ويراضيني ..
اللهم آمين
Comments
Post a Comment