هو أنا بكلم نفسي هنا؟


هو أنا بكلم نفسي هنا؟
 أُمّال ليه أنا حاسة بكده ؟؟

أنا ليه حاسة إن ماحدش سمعني؟؟ أنا ليه أيقنت إني مسجونة ؟؟
 ليه دايما عندي إحساس بالوحدة مع إن عندي صحاب كتير ؟؟
وليه دايما حاسة إن حقي مش موجود مع إني بأكل وبشرب ومصروفي موجود ؟؟

وليه حاسة إنى بتضيع مع إن عجلة الإنتاج ماشية والإستقرار مالي البلد لحد الملل ؟؟
وليه دايما خايفة إن المجلس العسكري يحكمنا بدل مبارك مع إنه دايما بيوعدنا بغير كده ؟؟
وليه مجلس الشعب متعملش في سبتمبر مع إن الثورة قامت في يناير ؟؟

وليه لسة بيتقال على الشباب شوية عيال وبلطجية مع إن اللي سرقوا و قتلوا بيتحاكموا ؟؟
وليه عيال زي أحمد سبايدر وكريم حسن لما يطلعوا يقولوا على الملأ إنهم بيضربوا في ناس مابيتشدوش وألتراس أهلاوي يتعمل عليهم كمين عشان يحرمهوا ينطقوا تاني ؟؟

وليه 6 ابريل يتقال عليهم خونة واللي خان البلد 30 سنة قاعد في مستشفى 100 نجوم ؟؟
وليه أول ناس إتحسن وضعهم في البلد هم الظباط وأهل الدويقة قعدوا بالشهور في الشارع من غير ما حد يعبرهم وفي الآخر اتفضوا بالقوة ؟؟؟

هو ليه دايما الشعب في ناحية واللي حاكم البلد من غير ما يختاره حد في ناحية تانية ؟؟

هو مش إحنا في بلد واحدة ولا إيه ؟؟

هو إحنا مش بنشرب نفس المية و بنأكل نفس الأكل و بنروح نفس الأماكن و عايشين في نفس الكرة الأرضية ولا إيه ؟؟؟


بالله عليهم حد يرد عليا .. يمكن أنا غلطانة .. مش مهم .. بس الأهم أرجع أحس من تاني إن حواليا ناسي وأهلي وعزوتي اللي خايفة عليَّا وحمياني من الأطماع و الغدر و الخيانة ...

إمضاء ..

مصر

.. N.O.H.A ..

Comments

Post a Comment

Popular posts from this blog

إديني ودنك يا مواطن

A Diamond Treasure - a Short Story