نفسي ...

قلبي مجروح .. نعم قلبي جريح .. يعتصر و يتألم ويحاول الهروب  ..

عيني مكسورة .. مقهورة .. مسجونة .. فيه روح جواية حرة بس مش قادرة تعيش ..

سنين عمري بـتتسرسب  مني سنة  ورا  سنة  و يوم بعد يوم ومازلت في مكاني ولم يتغير حالي ..

الأيام بـتجري بسرعة الصاروخ ومازلت تلك الفتاه الخائفة الضعيفة التي لا تملك من أمرها شئ ..

لست ممن يسخط من قضاء الله وقدره .. فـوالله الذي لا إله إلا هو لا أريد من هذه الحياة شئ إلا رضاه ..

لكني سئمت الضعف والمهانة .. تعبت من الإستسلام .. لم أعد أطيق السلبية .. وللأسف لا أملك غيرهم الآن ..

سئمت معرفة الضعفاء .. ولكن هم من أشعر بالألفة بينهم .. فأنا ضعيفة مثلهم ..

كل أمنياتي إني أرتاح ولو قليلا .. ولكني لا أستطيع ..

نفسي ألاقي حد يكون سندي ..

نفسي محسَش بالذنب طول الوقت ..

نفسي أصحى كل يوم وأنا مبسوطة ..

نفسي مهربش في النوم ..

نفسي قلبي ميوجعنيش..

نفسي مخافش إني أخسر اللي بتمناه من قبل ما يحصل ..

أحلامي بسييطة والله .. بسيطة قوي .. نفسي في الأمان ..

نفسي في حضن ينسيني الهم .. نفسي أسند على حد وميجريش مني ..

نفسي حد يقف جنبي .. نفسي ما تصعبش عليَّا نفسي .. 

نفسي محدش يبص عليَّ بشفقة ..

نفسي أنجح في حاجة .. نفسي .. 

نفسي أخد معايا حاجة لقبري من غير ما أكون خايفة .. 

نفسي أتكلم مع حد وما يقولش اصبري ..

نفسي أهرب ..

نفسي أسافر ..

نفسي الاقي راجل يتحمل مسئولية نفسه ومسئوليتي ..

نفسي في الونس .. في السكن .. في الطبطبة ..

نفسي أبطل عياط ..

نفسي طاقتي ترجع ..

نفسي أروح الجنة .. تعبت قوي هنا .. قوي .. 

نفسي أروح مكة وأموت هناك .. 

نفسي كل اللي اتخلى عني يحس بقيمتي .. 

نفسي أفرح .. أفرح بجد من غير خوف .. أفرح في النور قدام الناس كلها ..

نفسي أصرخ ..

نفسي كل اللي ظلمني يفوق .. على الأقل يبطل ظلم ..

نفسي أحس بطعم الحاجة ..

نفسي أتكلم وحد يسمعني ويفهمني بجد ..

نفسي أنام وأصحى الاقيني في حتة تانية ..

نفسي أغمض عيني وأفتكر ذكريات حلوة بس ..

نفسي في حد يستحملني ...

نفسي في حضن .. حضن زي حضن جدي كده .. حضن رباني صافي ...

نفسي أثق في حد وما يخيبش ظني ..

يا رب ....